ابني بينسى الارقام

[رحمة الرحمن]

السلام عليكم ورحمة الله هذي اول مشاركه لي , فارجوا منكن مساعدتي لدي ابني في الصف الاول ممتاز في كل المواد وحتى الحساب ممتاز في الجمع والعد ولكنه لا يعرف الارقام ولي شهرين باحاول معاه بكل الطرق بالالعاب والعداد و الترغيب وحتى الضرب icon24 الا انه ما استفاد شو السبب اكتب له الرقم بعد ثواني ينساه ولا كانه مر عليه وهالحين يصير يخاف ويرجف لما اساله عن العدد شو الحل ياريت الي بتعرف مواقع بتشرح الارقام بطريقه حلوه تسهل الحفظ او اي فكره تساعدني فيها , ولاحظت انه حتى الارقام الي يعرفها بعد جهد جهيد بيستعين طريق العد على اصابعه او عن طريق ربطها بالانشوده الي كانت معاه في الروضه يعني زي الخمسه كعكة سكر... وهكذ هل امنعه من استعمال هذي الطريقه لانها بطيئه وما تفيد في كل الاعداداو اخليها الله يعطيها الجنه الي تساعدني

[رحمة الرحمن]

ما شاء الله على المدرسات ولا رد واحد يجبر الخاطر لهدرجهالموضوع صعب

[شمسة]

السلام عليكم ورحمة الله وبركاته

أختي رحمة انا اتبع طريقة بسيطة مع البنات الضعيفات اللي عندي انا استعملها للحروف لاني معلمة لغة عربية لكن اعتقد انك ممكن تستخدمينها مع ولدك يمكن تجيب نتيجة

شوفي يا اختي انا مسوية كف لكل تلميذة وكل صبع من اصابع الكف مرسوم عليه الحرف مع صورة صغيرة وكل يوم كل البنات يلبسن هالكفوف وانا اسال عن احد الحروف وكل وحدة ترفع الصبع اللي عليه الحرف مثل الصبع الصغير حرف الالف اشوف كل البنات رافعين هالصبع وكل يوم اراجع معهن والحمد لله حسيت انها جابت نتيجة مع البنات الضعيفات انتي جربي اكتبي الارقام على كف وخليه يلبسه وقت المراجعة واعتقد انه بيحفظ بسرعة لكن خلي مع الكف صور او اصنعيه بطريقة حلوة غير تقليدية عشان ولدك يحبه دائما اخرجي عن المألوف لانه الاطفال بطبعهم يحبون الاشياء الغريبة اللي تجذبهم

وفي طريقة ثانية انا بعد استخدمها هاتي صندوق وحطي العاب ولدك المفضلة اللي هو يحبها وعلى كل لعبة كتبي رقم وبعدين اطلبي منه ان يطلع لك مثلا القطار وراح يدور ويلاقيه اسأليه وش الرقم اللي على القطار وهكذا
انا استخدمها للحروف


ان شاء الله قدمت لك شي يقدر يساعدك







تحياتي